Kwen Powetik Kècho...

 

Mezentèpretasyon ✅


Yèswa mwen kouche san dra

sa pa vle di m kouche Sandra

yo di raje yo gen zòrèy poutan yo bèbè

reponn san konprann se chemen djòl bòkyè


mwen santi m ta fè bagay

san w pa mande m detay

ou pa menm tann mwen fin pale, pa vre !

w ap mache di moun m te mande w koke


lotrejou Betina jete yon timoun

li takle pye l li bay li yon gwo so sou do

hmmm! lide w gentan desann nan kanivo

ou gen kè w di m te di l sot avòte, Timamoun !


m di w m poko janm pase mwa Mas isi

paske m toujou lòt bò ap voye berejèn

ou plede di lòt moun m pa renmen bere jèn

m gen move mès epi m se yon masisi


anpil nan nou renmen pale san nou pa te konprann

nan djòl nou gen yon latchouloulout cho ki pa ka tann

n ap mache tèt souke de pye gaye nou byen prese

zòrèy nou sansib nan chèche koze pou n mezentèprete.


© Malherbe JOSEPH

06/10/2023 ✅

Commentaires

Enregistrer un commentaire

Posts les plus consultés de ce blog

Kwen Powetik Kècho (14/05/2023).

Image
Manman m se t on nonm... Manman m pa t feminen, paske l te g on nanm etewo, yon vanyan gason, manman m te g on lanmou pou pantalèt, sa fè l te toujou mete bèl kanson, manman m pa t pouse pitit, men pou kò l, li te elve 7 timoun, manman m pa t gran fanm, men l te pòtre yon gran zouzoun. Manman m pa t feminen, men l te gen plizyè kalite w plis jwenn lakay fanm, manman m te konn lave, pase, fè mache, fè manje, netwaye kay, ranje kabann. Manman m te aprann mwen fè tout bagay sa yo tou ak anpil lòt ankò, se sa k fè kounya manman m travèse, m ka viv pou kò m, paske anndan m g on trezò. Manman m pa t rive lwen lekòl, men l te chwazi fè restavèk pou m ka met kòl, manman m te toujou renmen di m, pito m manje pen m sèch olye m bese zepòl. Manman m te gen karaktè, li te sevè, li te plezan e l te sansib pou respè l, devan respè l, WA pa t kouzen l PREZIDAN pa t bòpè l, li pa t ap pè fout ou yon pataswèl. Manman m pa t yon feminen, men l te elve m pou m respèkte fanm, manman m te damou fanm tou, li...
Lire la suite

Kwen Powetik Kècho...

Image
Krevas ... M jwenn yon sous dlo fre pou m pase swaf an m nan lanbe li  ak lè m plonje tèt flèch kann kale m andidan y m santi m ta yon kannari  pou m charye dlo sa  san kite ti gout  pou m f on boutèy tranpe pou m kage lè m anvi mete  chalè bande m sou twa wòch dife sou twa pye l nan tèt sous sa g on bouch ak de pwent file byen kanpe pou m miyonnen avan dlo gaye jouk l al wouze bout kann an m menm lè lapli pa tonbe depi l wè m li gentan mouye sous la gonbo li bade veso m pou m  pa filange lè krevas la pral akeyi m yon akèy san parèy fòtadi g on men ki kenbe m nan tèt levye m k ap dirije m nan chimen kwense anba yon son k ap fè koup koudoup  koup koudoup tankou zo k ap deplase anba vyann venn foule krevas sa pa gen plas pou de mezi longè m mezi gwosè m mezi dousè m yon sous prive pou m pase swaf an m wouze kann an m jouk dòmi pran m. © Malherbe JOSEPH 27 Dawout 2023...
Lire la suite

Kwen Powetik Kècho...

Image
  Vètyè...🇭🇹📌 Yon pase ki fè n fou tou fyè menm lè se pa tankou ayè sitou kèk tan nou vin drivayè ayisyen nanchon kanson fè Vètyè senbòl inite ak rezistans Ayiti manman libète ak vayans avan 1803 nou t ap pote yon kwa apre 1803 nou te premye pèp nwa nou lib chapo ba pou ewo nou yo sou do vètyè yon jou vètyè toujou pa twò lontan fòk li fè klè san jou pou n sispann pran kou nan do. © Malherbe JOSEPH      13 Novanm 2023       3 è nan apre midi ✅
Lire la suite