Kwen Powetik Kècho...

Lè m pa jwenn pèsonn.

Lè m pa jwenn pèsonn pou m pale

san m pa deplase mwen evade

anndan lespri m m tonbe kalkile

pale pou kò m pou tèt mwen pa eklate

lè m pa jwenn pèsonn pou m pale

m antre nan nanm mwen epi m medite

m pran refleksyon m yo tou dezakòde

m f on melodi avèk mo m pa ka chante

lè m pa jwenn pèsonn pou m pale

m ale anfas yon miwa m kanpe

m gade tèt mwen k ap gaspiye

m f on gwo bri pou m santi m egziste

lè m pa jwenn pèsonn pou m pale

m ekri tout doulè m sou yon fèy papye

m fè yo vin zanmi ak dlo nan zye m

m aprann sou yo pou m ka transfòme m

lè m pa jwenn pèsonn pou m pale

m eple pale plizyè fwa pou m pa depale

m rale pèsonalite m pou m apiye

m desann sou jenou pou m pa pliye

lè m pa jwenn pèsonn pou m pale

m fè retrè nan enèji m te anmagazine

sa fè m pa plonje lè move tan yo rive

gen moman pèsonn p ap ka ede m vre.

Malherbe JOSEPH

(Relem Moun)

25/06/2023, 8è55 P.M.