Kwen Powetik Kècho (3 Septanm 2007)

 Pawòl san mo.

Mwen pa ka touche w

poutan w pi pre mwen

anndan kè m mwen kache w

ni ou, ni mwen, byen lwen.

Lè zye m fèmen, kè mwen ouvè

ou toujou pale avè m alanvè

lè kè m fèmen nan fè nwè zye m klè

ou ekri anyen devan dèyè.

Pi lwen m, andedan kè m pi fon

avèg wè l, soudè tande l, bèbè pale l

pawol sa monte anba pou l desann anwo

Lanmou kenbe kolèt distans,li fese l

l antere l nan yon gran ti twou san fon

pou lwen zye pi pre kè, pawòl fyèl kou siwo.

Nou tout konprann, nou tout dakò sof mwen,

m p ap dekouraje m ap tann 30 Fevrye

m ap fèmen tèt, bese zye, prye tann Bondye

pou jou yo pa janm chanje, pou m ka wè demen.

Otè : Malherbe JOSEPH (Relem Moun)

            3 Septanm 2007