Kwen Powetik Kècho (15 Avril 2023).

 Si pye w ta chape.

Dòmi ta epi leve bonè si w vle fè bonè w.

Travay entelijamman pou w jwenn respè w.

Limit ou dwe vini avan siksè nan diksyonè,

men, nan vi w se siksè w ki dwe bay limit limyè.

Yon jou lavi gen pou l peye w pou efò w, w ap bèl.

Antouraj ou, gen pou pran w kòm modèl,

paske w te kanpe anfas echèk, tankou yon rebèl.

Pa twò prese pou w pa kase zòtèy ou non, katèl!

Chak moun k ap viv gen yon jou nan 365 lan,

yo gen tan yo anndan kantite tan y ap viv lan,

yo gen yon tan ki fikse pou yo vin gran,

pandan y ap travay, rete enb, san fè gran panpan.

Si pye w ta chape yon jou, ou p ap tonbe nèt anba,

menm si w ta tonbe anba, efò w yo va sèvi w matla.

Pou zo w pa brize, pou w ka kokobe. Leve, leve!

Si pye w ta chape, se paske w t ap chèche. Leve!

Malherbe JOSEPH (Relem Moun)

  15 Avril 2023.