Kwen Powetik Kècho...

Ewo w ye !!!

Ou leve

ou pa jwenn anyen

ou ale lekòl

fè nivèsite

malgre sa

ou pa vo anyen

ou rete dwat

s on ewo w ye

Ou pa jwenn travay 

ou kreye,

enstabilite kraze l

ou rekòmanse 

avèk de men

pou bati demen 

s on ewo w ye

s on ewo w ye

yon sitwayen responsab,

ou responsab

ou pa jwe lavi anba tab,

onètete w 

pa negosyab,

s on ewo w ye 

nan mitan rayisab

Ou toujou vle ede lòt,

lè w nan pwoblèm 

yo di w lavoum,

malgre sa 

ou gen lacharite

paske 

s on ewo w ye

Yo fè w mal 

ou mande byen pou yo,

ou viv byen avèk yo 

yo ba w kou nan do,

ou pa jwenn resipwosite

men w rete moun

s on ewo w ye

Ou ta renmen wè 

peyi w chanje

pasifikman w pwoteste 

ou patisipe tou

yo fout ou bal 

yo fout ou gaz

ou ret kanpe

s on ewo w ye ti jèn 

Ou vwayaje

Ou retounen 

vin pataje 

pataje sa w konnen nan vwazinay

yo di w fou

gen foli kandida

s on ewo w ye

paske 

ou pa deside kite sa

W ap mennen

W ap mennen lit 

ki depase w,

w ap bay yo pas 

pandan y ape takle w

w ap bay limyè 

yo anvi etèn ou

ou s on ewo 

nan mitan moun fou

Kiyès nan paragraf yo 

ki sanble w ?

ou jwenn yon moun deja

onore w ?

si w ap travay 

san enterè mesken,

konnen 

Ou s on ewo 

menm lè antouraj ou maltrete w

Malherbe JOSEPH

22 Dawout 2023

9è 44 nan aswè.