Kite m pale ak vè m...

Pa pale ak vè m pito w vin pale avè m

pa fè gwo kè ni pa vin tou pal anvè m

rete fèm m pral sakaje w avèk bri kè m

m pa t ap janm mande w libere m

ou fin mete m lib epi w bwè fyète m

ede m batay ou bere m pou w pyeje m

epi kou m pale w di m gen foli rime

se teyat m ap fè m s on desen anime

ò ! machwè m pòtre sann dife ki mouye

ou panse m sou ou poutan m ap pale ak vè m

m pa konn kote w soti vin kanpe nan baryè m

vin anmède m m tou deja plen pwoblèm

kounya menm moun pa ka fou anpè ankò

w ap pale pou kò w yo pa konprann y ap ba w tò

lè w pale avèk yo menm si yo konprann ou merite lanmò

tan pou sa pito m pale ak vè m yo chak jou

pou moun pa fè m lèmi toudenkou

oubyen al veye m nan fè nwa pou ban m kou

yon bwa alimèt gen vyann sou zo l pase m

li long tèt li wouj men se pa pase panse m

panse m se yon pansman lè rim yo blese m.

Malherbe JOSEPH

(Relem Moun)

8 Me 2023, 12è 30.

Relem Moun KÈCHO ribrik ak KLE.