Pantalèt...

Ou g on jan w kouvri jaden Edèn li, tankou bèl nap pwòp sou tab gani,

lè l kouche sou do de pye l gaye, dòmi pran l, pou m ap kontanple lavi !

Lè l kouche sou vant, de bò bounda l se premye ochan ki akeyi m,

avèk gòl mwen tire byen long, m ap gade pye mango l k ap di m : "vin keyi m".

Kit li tounèf, kit li pèpè, kit li chire, kit li gen twou nan fouk,

depi l kouvri po devan l, pyebwa m vin djanm tèlman pouse chouk.

Pantalèt pa ni bwat lèt, ni bwason enèjetik men l s on fòtifyan,

pou tout gason k ap kalalou oubyen k ap pran pòz kannannan.

Pantalèt, se yon drapo ki ta dwe desann sèlman devan moun ki gen sans responsabilite,

men anpil fwa l desann devan kadejakè, lajan ak moun ki soufri avitaminoz mounite.

Erezman pou yo pantalèt pa gen djòl pou l ta temwanye devan tribinal,

sinon, gen anpil moun ki t ap kòmanse respèkte pantalèt, tèlman l t ap enpasyal.

Jodi a m chwazi onore w, pantalèt, ou se rido devan pòt sen bab oubyen sen do kiyè fè,

lè m chwazi desann ou, m ka tou rantre nan paradi, konsa tou m ka plonje nan lanfè.

Fanm, konn kiyès w ap bay desann pantalèt ou, gason pridan, pa desann tout pantalèt,

paske anba pantalèt ou ka bwè lèt kabrit oubyen lèt bèf, konsa tou w ka pran nan chankalèt.

Malherbe JOSEPH

(Relem Moun)

11/05/2023, 7è nan aswè.

Relem Moun KÈCHO ribrik ak KLE.